Vision Before Execution

الرؤية تسبق التنفيذ.

كنت زمان بحب أشتغل لوحدي، وأقوم بالشغلانة من أولها لآخرها بإيدي. ولو حد اشتغل معايا وطلع أشطر مني، كنت أتضايق في سري وأقول: “هو أنا ليه مش زيه؟ أنا مش ناقص إيد ولا رجل!” بس والله كانت غيرة حميدة، مش حقد ولا حسد، كانت دايمًا دافع وتشجيع إني أتعلم وأطور نفسي. ومع الوقت، ومع كل تجربة شغل عدّت عليا…

اكتشفت إنّي ما بقيتش أقبل أشتغل غير مع ناس أشطر مني في الدور اللي بيقوموا بيه. ليه؟ .. لإني سألت نفسي كام سؤال بسيط غيّروا تفكيري:
→ هو إيه القيمة المضافة ليا لو اشتغلت مع ناس أقل شطارة مني؟
ولا حاجة تقريبًا.

→ هل هستفيد حاجة جديدة أو أتعلم مهارة مختلفة؟
نادر جدًا.

→ هل النتيجة النهائية بتطلع مميزة فعلًا؟
لأ، بتبقى “كويسة”، بس مش “مبهرة”.

لكن لما بدأت أشتغل مع ناس أشطر مني… كل حاجة اتغيّرت. بقى فيه قيمة مضافة حقيقية، تبادل خبرات، جودة شغل أعلى، أفكار أوسع، واكتشفت إن فكري هو اللي دايمًا سابق مهاراتي. وعشان رؤيتي تطلع للنور بشكلها اللي في دماغي، كنت محتاج أجيب أشطر الناس ينفذوها معايا.

اتعلمت إن دوري الحقيقي مش إني أعمل كل حاجة، لكن إني أحط الرؤية، وأبني وأوصل فريق ببعض يؤمن بيها ويكمّلها بإبداعه. والجميل كمان إن الشغل مع الناس دي مش بس فادني مهنيًا، لكن كمان على مستوى العلاقات الشخصية، اتعلمت، اتطورت، وبنيت صداقات وشراكات ملموسة. وبالمناسبة…

حابب أقول شيء في منتهى الأهمية: الشغل مع حد أقل منك شطارة "بنية إنك تعلّمه وتبني فريق" ده من أسمى وأجمل أنواع الشغل والغايات والأهداف، لأنه بيضيفلك على المستوى الإنساني أكتر من المهني. هتسألني: إيه هي أكبر استفادة ليك من شيء زي ده؟
هرد وأقول: هو "انه استثمار مع ربنا في نفع الناس" و "إعادة اكتشاف نفسي من تاني".

بس أوعى تستثمر في شيء زي ده إلا في أرض خصبة.. إيه هي الأرض الخصبة؟ هي الشخصية اللي عندها مثلث من ثلاثة أضلاع: (خُلق حميد – سلوك جيد – احتياج للتعلُّم.) من الآخر يعني… متعطش إنه يتعلم.

أنا أحمد ناصر، مُخرج وصانع أفلام وراوي قصص للعلامات التجارية، وبشتغل مع كل الناس اللي في المجال الإبداعي، سواء كانوا مصورين أو مونتيرين أو مصممين أو منتجين أو مديري تسويق أو صناع محتوى أو كُتّاب. لو انت حد من دول ووصلت لحد هنا، فيشرفني إننا نتعرف ونتواصل سوا.

وإذا كنت محتاج أي خدمة في مجال الميديا تحت مسمى (فيديو / فيلم / إعلان / تصميم)، فيشرفني إنك تتواصل معايا بشكل مباشر من خلال الرسائل أو الميل: hello@ahmednasserfilms.com

الصورة مع الشارك: أحمد طارق.
سمعت منه حاجة هي من أكتر الحاجات اللي أثرت فيا وفي عقليتي، "اللي معندهوش حاجة يخاف يخسرها فرصتهُ للنجاح وانه يصنع شيء محدش عمله من قبليه أكتر بكتير من اللي طلع لقى عنده حاجه خايف يخسرها". فقولت مبدهاش بقي...